|
Arşevê Oskan
Di sala 1967 an de, li gundê Bîrkinêsê, di
navbera bajarê Dirbêsî û Serêkaniyê de, ji dayik bûm e. Li
gundê me, ji bilî zimanê kurdî nayê axaftin, dayika min
heyanî ku koça dawî kir, hînî zimanê erebî nebû. Bavê min,
bi sê zimanan zanîbû, kurdî, erebî û turkî. Dibe ku ji
sedema zimanê dayikê be, zimanê kurdî li cem min, tu toz
nehat ser û pîrozbahiya xwe bi xurtî parast. Dê û bavê min,
wek hemû malbatên Kurd bi jiyana çandinî û xwedîkirina
heywanan ve mijûl dibûn. Bavê min ji êl û eşîra Azîzan e,
herweha gundê me ji 120 malbatan pêk tên û piraniya wan, ji
mala Oskan in, Oskan bavekî mala Bozo ye, û Bozo jî, yek ji
şaxên êla Azîzan e.
Min xwendina xwe ya despêkê (seretayî) li gundê xwe kir û ya
navçeyî li bajarê Dirbêsiyê û herweha lisse li bajarê
Hesiça. di sala 1988 an de ez ketin nav leşkeriya Sûrî ya ku
bi darê zorî herkes didan ber xwe û ew dajotin leşkeriyê.
Min leşkeriya xwe li ser derya sipî li ser pişta gemiyan
derbas kir, li bajarê Latakiyê, başûrê Eskenderonê. Heyanî
1991 ê ez jê rizgar bûm û vegeriyam gundê xwe.
Berhemên min yê piştî leşkeriyê piranî helbest bûn, di
pirtûka minî yekem „Hêviyên Birîndar“ de, sala 1995 an de cî
girtin. Helbestên min yê piştî sala 1995 an, di pirtûka minî
diwem de, bi navê „Kê Gul Çînî?“ di sala 1999 an de çap bûn.
Berhema min ya sisyan „Berbang Qedexe ye“ sala 2001 ê de, bi
helbestên nûjen çap bû, û bû yek ji weşanên kovara Zevî. Di
sala 2001 de me biryara derxistina govara Zevî da, ez bûm
sernivîserê wê. Heyanî dawiya 2003 an 10 hijmar jê derketin
û bi derketina minî ji welêt, ew jî rawestiya, mixabin.
Kovareke rewşenbîrî serbixwe bû.
Ez di sala 1996 an ji keçek mirovekî xwe zewicîm, ji me re
sê zarok çêbûn, Eyaz, Neyaz û Amed, du kur û keçek.
Dijwartirîn sal di temenê min de, salên di navbera 2000-2005
an de, di van herpênc salan de, min dê û bavê xwe winda kir,
ez kocberî Europayê bûm û ji zarokên xwe dûr û derdê
xerîbiyê dikşînim... û hinek zehmetiyên din. Lê dîsa jî ez
dibêjim divê mirov xwedî bawerî be, da ku biserkeve.
Hêvîdarim ku salaên bên, gelek derî û girêkan veke. Ji
berhemên min û we yên ne çapkirî :
- pirtûkek ji çîrokên dahînanî.
- = helbestên nûjen.
- = helbestên kilasîk.
- şevbuhêrkên Hamburgê. Diyalok bi kek Husên Dozen re.
Pirtûkek serpêhatî yên li Almaniyayê |
